Aos dezasete anos, a vida de Miguel Foz complícase decisivamente. Con problemas de notas e comportamento no instituto, a infidelidade do pai, que di marchar de viaxe de traballo e el descobre que vai de vacacións coa amante, ocasiona a ruptura matrimonial. Ademais, a morte duns tíos en accidente aumenta a familia cun curmán diminuído físico e mental, Abel. Miguel convértese no seu grande valedor.
Pero o acontecemento decisivo prodúcese cando no bar-refuxio aparece vendendo rosas unha xitana, Reina, e Miguel sente que coa moza vén algo novo. O irmán dela, Bruto, e os seus amigos vínganse das súas relacións cunha malleira e navallada a Miguel. As bandas de ambos enfróntanse definitivamente o sábado onda uns precipicios. As malas artes dos ruíns compañeiros de Bruto, entre os que non falta un delator, provocan o desenlace mortal de Abel.