Volume no que se recollen o relato premiado no XVI Concurso de Contos para a Mocidade 2000 e os catro accésits. A edición ábrese cunha presentación asinada polas dúas entidades organizadoras na que se reflexiona sobre a idoneidade dunha canle escrita, como a do presente libro, para que os autores atopen deste xeito os seus lectores, mozos coma eles, culminando así o verdadeiro fin da creación literaria.
Reprodúcense a continuación os contos premiados. En primeiro lugar, o relato gañador, "Todo por unha teima", de Martiño Maseda Lozano e a seguir os catro textos que mereceron accésit: "Cuarto baleiro", de Jorge Gende Díaz, "O proxecto McGuffin", de Santiago Bergantiños, "Metamorfose nunha noite de chuvia", de Beatriz Lorenzo Pérez, e "Auga Salgada", da autoría de Marta Fernández López.
Inclúese tamén a ficha técnica do xurado así como a relación dos corenta e sete participantes, con indicación da localidade de procedencia e ano de nacemento.