No libro vai todo a cen, a toda velocidade, sen tempo sequera para pararse a poñer maiúsculas nos principios de parágrafo. Non hai tempo máis que para vivir sen tregua, percorrer a xeografía, probar tódolos sabores, escoitar as últimas músicas e loitar.
Todo a cen é tamén a tenda na que traballa o protagonista. Pode que todo estea en venda, e que ademais sexa barato.
A ese ritmo endiañado váisenos contando o día a día de Uxío, Álex e Aintzane; tres xoves, froito do seu tempo e do país que lles tocou, das ilusións e desilusións, amores e desamores.
Galicia, Euscadi e Portugal son o lugar. O tempo, o presente e un futuro próximo. As aventuras, mil e unha. A reflexión, ver se estamos de acordo ou non con Álex: a vida é un funil, vai reducindo as posibilidades de cumprir os nosos soños.