A Asociación de Profesores de Língua e Literatura, co obxectivo de proporcionar material didáctico para o traballo diario nas aulas, promoveu esta edición de dez Cadernos da Escola Dramática Galega. Os criterios de selección dos tres autores da escolma baseáronse na necesidade de ofrecer unha visión diacrónica do teatro galego, presentar obras de calidade e entretidas e facilitar a posibilidade da súa representación.
Recóllense a primeira obra coñecida escrita do teatro galego ("Entremés famoso sobre a pesca no rio MIño") e textos desde o XIX ata a actualidade: "A Casamenteira", "A domeadora", "Mourenza", "Farsa das zocas", "Fedra", "O pauto" e "Tres crimes en busca dunhas labazadas" ademais da portuguesa "O doido e a morte" e o clásico "Petición de man" de Chekhov.