Reúnense neste volume un conxunto de lendas recollidas da nosa tradición oral e procedentes, fundamentalmente, do Concello de Mesía (A Coruña). O volume, dedicado "á xente miúda", ábrese cunha introducción na que os recompiladores falan das características das lendas, das súas diferencias co conto, dos personaxes máis habituais, etc. Manifestan, tamén, a intención de dar a coñecer estes testemuños entre o público infantil e xuvenil.
Preséntanse estas lendas agrupadas por bloques temáticos segundo a presencia nelas de reis e fadas, mouros, encantadores, santos milagreiros, bruxas, animais, trasnos, etc. Noutros casos parten dunha explicación sobre as augas, as fontes, os penedos ou os tesouros agochados.