Reúne as narracións premiadas no XIV Premio Ourense de Contos para a Mocidade 1997 convocado pola Casa da Xuventude e a Agrupación de Libreiros de Ourense. A edición ábrese cun breve limiar asinado polas dúas entidades organizadoras, que destacan a capacidade imaxinativa dos autores premiados, con persoais e diferentes visións da realidade, desde a óptica cultural galega.
Reprodúcense a continuación os contos premiados. En primeiro lugar, o relato gañador, "Sobre toupas, castañas e outras nimiedades", de Marisé Suárez Leal e a seguir os catro textos que mereceron accésit: "Labirinto", de Marco V. Lama del Corral, "A convicción", de Jaime Santoro de Membiela, "Colega", de Laura Camino Pais, e "A favor dun amigo", da autoría de Javier Santama Panero.
Inclúese tamén a ficha técnica do xurado así como a relación dos corenta e oito participantes, con indicación da localidade de procedencia.