Recóllense neste libro tres novelas curtas, dúas das cales -"As augas van caudais" e "Os alugados"- foron publicadas na revista Grial. A estas engádeselles, tal e como explica o autor no prólogo, o relato titulado "O xornaleiro".
As tres historias teñen lugar en aldeas da provincia de Lugo e acollen outras tantas estampas da Galicia rural, que no caso da primeira ambiéntase despois de 1936 e nas outras dúas antes desa data.
En "As augas van caudais" relátase o sufrimento dun pobo a piques de ser asulagado pola construcción dun encoro e que culmina coa morte do xefe administrativo a mans de Fuco cando se lle solicitaba o desaloxo.
En "O xornaleiro" cóntanse as dificultades económicas do xornaleiro Manuel nunha situación na que a explotación no traballo lle atinxe mesmo aos nenos, conformando unha fatalidade que ten o seu cumio co comezo da guerra.
Por último, "Os alugados" ten como escenario a colleita do trigo e o centeo en terras do centro da provincia luguesa, narrándose os problemas que xurdían arredor destes labores así como as causas polas cales a xente se desprazaba para realizar a mencionada tarefa.

    Claves de lectura -  Everest Galicia (.pdf)