Suso de Toro, como mantenedor no acto de entrega dos premios, reflexiona no Limiar sobre a súa relación coa literatura e a palabra na súa infancia e mocidade, no tempo hostil para a cultura da dictadura franquista. A ilusión, a crenza nas súas arelas de despechar novos mundos escribindo en galego, a aprendizaxe que non esquece a cultura popular e a que quixeron compartir algúns bos profesores afirmárono na necesidade vital de ser escritor. A seguir, cunhas breves pinceladas, caracteriza as obras galardoadas nesta edición do certame.
Seguen, logo, os traballos premiados. En primeiro lugar, os poéticos, da autoría de Lucía Aldao Sánchez, Alba Vidal Fernández, Antía Gándara Hermida, María López Jiménez e Marisol Gándara Sánchez. Os autores dos textos narrativos son Bianca Cid Bouzas, Carolina A. Castro Estévez, Xabier Gil Jardón, Pablo Álvarez Vasallo e Ana I. Cabido Quintas. Todos eles, xoves que cursan estudios de ensino medio en diferentes centros de Galicia.