Tevo, vello amigo, escríbelle unha carta a Xandro citándoo, desesperado: está "tirado" e con débedas que nunca dará pagado co que saca vendendo panos nos semáforos. Pero antes de chegar a hora do reencontro, morre.
Comeza entón a lembrar Xandro en primeira persoa cómo coñeceu a Tevo no colexio e empezaron cos canutos e pequenos roubos. Con outra amiga, formaban un trío de "colgados" que traficaron con heroína e arruinaron o seu futuro. A Tevo ata a súa propia mai, que mesmo lle chegara a preparar un pico, o denunciou, pois vendía todo o que pillaba na casa para subministrarse droga. Unha vella amiga vénlle demandar axuda para manter a súa dependencia. É testemuña do asasinato en pleno Entroido do vello traficante Lilico.
El pasou por varias clínicas de desintoxicación, viu morrer a varios compañeiros e agora está desenganchado. Traballa nun pub e ten moza, ensinante, coa que comparte piso. Aos seus 31 anos séntese parte dunha xeración de revolucionarios fracasados.
Unha empresa americana quere vender a lúa en anacos. Non ten fin esta historia baseada en feitos reais: virán máis lúas.