Reúne as narracións premiadas no XX Premio Ourense de Contos para a Mocidade 2003 convocado pola Casa da Xuventude de Ourense.
No relato gañador do premio "Ourense", Polbo á feira, de Pablo Piñón Dacal, conta a voz narradora en primeira persoa que, seguindo ordes do xefe da súa organización mafiosa, tivo que contratar a mellor polbeira para celebrar un xantar de negocios cos enviados dunha banda romanesa. Como non lle foi posible polas boas, recorreu ao cloroformo para que non lle fallase a polbeira, que se vingou botando "Ratibrom" no polbo e liberando ao protagonista, que o mellor que pode facer é fuxir con ela para Portugal para iniciaren unha nova vida xuntos.
Publícanse, ademais, os catro accésits: Camiño de esperanza, de Iago Leiras Barreiro, conta unha historia da emigración: Ana marcha para Arxentina cos pais, deixando en Galiza o mozo Antón; pasan os anos e mesmo casa alá e ten un fillo, Antón, co que volve xa maior e viúva á vila natal, onde se reencontra co mozo da xuventude, coa nostalxia da vella carballeira. Unha cuestión de identidade, de Ignacio Mascuñán Freijanes, presenta ao Supervisor de Viaxes Transcoloniais do Hotel Canon-3, da Colonia Yarinia, quen por un erro da computadora central no teletransporte e no reagrupamento molecular tomou a faciana e o corpo do seu segundo; entón soubo que este era o amante da súa muller e que estaba furgando para ocupar o seu posto de dirección, polo que decidiu que saíra gañando no cambio e non denunciou o erro: o outro seguiría na súa nave cara a unha colonia da que había tardar en volver. En Cama ás escuras, de Emma Pedreira, cóntase que o amor existe tamén entre os corpos espidos e esqueléticos dunha fosa común. Rita Doallo Álvarez, en ¡Ai!, Xiana pon en primeira persoa a historia dunha rapaza, fea e orfa de pais drogadictos, que se namora da súa mellor e única amiga desde o colexio, guapa, rica e con mozo; ante a imposibilidade de que sexa súa só, mátaa; por iso está interna no psiquiátrico.
Inclúese a seguir a ficha técnica do premio, coa relación dos membros do xurado e dos trinta e cinco participantes, que presentaron corenta e tres contos, e o Cadro de Honra do concurso literario.