X. L. Méndez Ferrín, en calidade de mantenedor nesta edición do concurso, reflexiona no Limiar sobre os diversos axentes de cada sistema literario -desde os lectores aos políticos do contrapoder-, que a fin de contas forma parte da literatura universal e nela se incardina. Como, agás un autor, gañaron en todas as categorías as autoras, recorda que a literatura galega ten como símbolo principal e indiscutido a Rosalía de Castro, caso único nas literaturas do mundo. A importante participación no certame (196 traballos presentados) sérvelle para confirmar a vitalidade do relevo xeracional, cumprindo así un rol importantísimo no noso espazo literario, que tamén soubo recuperar a súa presencia na posguerra cando a literatura galega estaba condenada polo poder a desaparecer. Finalmente, fai unhas consideracións sobre a necesidade que teñen os escritores galegos de hoxe de manter o espírito dos Precursores, por integrantes dunha cultura e linguas non normalizadas, sen esquecer a necesidade de piratear todas as literaturas de fóra que poidan. E coa ambición de lanzarse ao novo, ao descoñecido, rachando as inercias e constituíndo estanzas que nunca antes foran vistas nin visitadas.
Figuran a continuación os traballos galardoados nestes XXXII Premios Literarios "Minerva". No apartado de poesía, Lorena Coto Ferreiro recibiu o primeiro premio polo conxunto de poemas agrupados baixo o título de "Tese da boneca rusa"; Lidia López Teijeiro, Berta Dávila Fernández, Lorena Abuín Lorenzo, Alexandra Eiras Rodríguez e Mónica Fernández Armesto fixéronse acredores ás outras distincións, que inclúen tres accésits. O primeiro premio de narración recaeu en Milena Martínez Basalo por "Pantomima"; Felipe Trillo Taboada de Zúñiga, Lorena Coto Ferreira, Andrea Calvo Rei e Antía García Casal recibiron o segundo premio, o terceiro e mais os dous accésits, respectivamente. Todos eles son xoves que cursan estudios de ensino medio en diferentes centros de Galicia.