Ábrese a publicación coa intervención, que se reproduce a modo de Limiar, no acto de entrega dos premios, do xornalista Fernando Ónega, en calidade de mantenedor nesta edición do concurso. Lembra con emoción que corenta anos antes acudiu á convocatoria como un mozo premiado polos seus poemas, en dúas edicións. Mais logo, aínda que ás veces en territorios próximos á poesía, o seu labor profesional desenvolveuse no campo do xornalismo. Anima, en todo caso, aos xoves premiados a seguir escribindo, mesmo sen ánimo de publicar, e sobre todo a ler para ser máis libres, como unha forma de rebeldía tamén contra o pensamento único que se pretende impoñer.
Figuran a continuación os traballos galardoados nestes XXXIII Premios Literarios "Minerva". No apartado de poesía, Berta Dávila Fernández recibiu o primeiro premio polo conxunto de poemas agrupados baixo o título de "Pequena serenata de inverno"; Ana Palua Lage, Alicia Fernández Rodríguez, Darío Fernández Fernández, Adrián Vázquez Barbón e, novamente, Berta Dávila Fernández fixéronse acredores ás outras distincións, que inclúen tres accésits. O primeiro premio de narración recaeu en María Rivo Vázquez por "Memoria dos ventos"; Alba Ceide Rodríguez, Rocío Díaz Lois, Ángeles Olalla Ferreira Cao, Bárbara González Vilariño e Lúa Mosquera Tenreiro recibiron o segundo premio, o terceiro e mais os dous accésits, respectivamente. Todos eles son xoves que cursan estudios de ensino medio en diferentes centros de Galicia.