Despois de morrer o pai de Isilda, as cousas non foron moi ben entre ela e a súa nai, e veu a vivir a Galicia coa súa tía Marta. Está facendo o Bacharelato no instituto e traballa no bar da Moncha polas tardes. Un día, cando vai para traballar, secuéstrana.
O seu profesor de Lingua Galega, que a vira xusto antes de que desaparecese, avisa ó seu amigo, o detective Ron Negriña para que a busque. Este vai descubrir que no asunto están involucrados a nai de Isilda e o equipo dun programa de televisión.
A narración desenvólvese en dous planos diferentes. Vaise alternando nos diferentes capítulos a acción no tempo real cos recordos de Isilda desde o seu lugar de encerro. Pódese considerar unha novela policíaca con características do xénero negro que sitúa a acción entre o sur de Galicia e Portugal. Aparecen referencias a actitudes xenófobas e fortes críticas ás actitudes manipuladoras de certos programas do medio televisivo.