Xosé María Paz Gago, en calidade de membro do xurado e mantenedor nesta edición do concurso, reflexiona no Limiar sobre o recordo de cando hai trinta anos se presentou, como alumno do colexio, ao premio cunha peciña teatral que non obtivo galardón; agradécelles, asemade, aos profesores do centro educativo que lle inculcasen o amor pola literatura. Remata cunha pequena loa dos xoves premiados nesta nova edición do veterano concurso.
Figuran a continuación os traballos galardoados nestes XXXI Premios Literarios "Minerva". No apartado de poesía, Lidia López Teijeiro recibiu o primeiro premio polo conxunto de poemas agrupados baixo o título de "Os imposibles no xardín"; María López Jiménez, Alexandra Eiras Rodríguez, Lorena Abuín Lorenzo, Diego Jesús García Campos e Fátima Peón Torres fixéronse acredores ás outras distincións, que inclúen tres accésits. O primeiro premio de narración recaeu en Diego Jesús García Campos por "Trinta anos sen Ducados"; Inma García Fernández e Lidia López Teijeiro recibiron o segundo e terceiro premio, respectivamente. Todos eles son xoves que cursan estudios de ensino medio en diferentes centros de Galicia.