Reúnense neste volume oito relatos que mostran as historias de personaxes que viven certas experiencias ou se ven motivados por determinados sentimentos, orixinados, moitos deles, pola guerra civil española.
En "Cando fala o fistor" nárrase o acontecido a Alexandre Magno que, logo de perder a memoria, loitará como mercenario do emperador Chun e xeneral dos guerreiros de Tartaria, pola defensa daquelas terras que anteriormente conquistara como rei.
En "Por un soño" relátase o sucedido a Herculano, o paxe de Sancha González, que rematará por decatarse de que o soño era a esencia do seu ser, posto que o soño era onde el vivía.
En "De Rodeiro a Casablanca" cóntase a historia dunha familia de Rodeiro que, a consecuencia da guerra civil española, se verá na obriga de ir vivir a Casablanca, onde a filla participará na loita armada para poder algún día regresar á casa.
"Belinda" céntrase no acontecido a unha rapaza xordomuda e moi querida por todos, que será raptada e violada por un home que chegara había pouco á cidade e que acabará morrendo despois dun encontro co irmán de Belinda.
En "Xaneiro 1959" nárrase a historia dun taxista galego que, logo da guerra civil, exíliase en Cuba, onde presta servicios a unha guapa e elegante muller que tiña un estreito contacto co Che Guevara.
En "A cor dunha lembranza" relátase o acontecido a Hortensia, unha muller que tras ser abandonada polo seu marido ao remate da guerra, tamén lle farán o mesmo os fillos cando van a Cuba para vingar o abandono do seu pai.
En "O lugar primeiro" amósase a un home que, despois de ter cometido un delito, lle confesa ao doutor que el non sabe quen é pero que si ten a lembranza dunha terra, polo que lle pide que o mande alí ou que lle dea unha medicina para reter o recordo.
En "Grupo Salvaxe" cóntaselle a unha persoa vinculada co cinema a loita que os galegos mantiveron contra os francese cando estes invadiron as súas terras, para facer dela o guión dun filme.