Relátase nesta novela a historia dunha familia acaudalada que vive nun pazo da vila pontevedresa de Redondela. O dono, Manuel Xesús Froilán Calderón de Celas, e a súa muller, María Xesús Beatriz Castro da Ponte viven sós ata que don Manuel aparece con María Xesús Micaela Calderón de Castro, unha nena que ninguén coñece e que queda a vivir co matrimonio. A alegría da nena, apodada Rato Chus polo tamaño dos seus incisivos, a súa simpatía e o seu carácter aberto contaxia a todos os habitantes do pazo e cambia por completo as súas vidas. A continuación descríbense as numerosas aventuras da nena na escola, na vila e no pazo. Todo sorrí na vida dos Calderón ata a repentina morte de don Manuel Xesús, un acontecemento que trae ao pazo a moitos dos familiares deste, entre eles ao seu irmán, un mariño mercante que pasou a maior parte da súa vida de viaxe, lonxe da súa familia e da súa terra e que resulta ser o verdadeiro pai de Rato Chus. Da verdadeira nai non se comenta nada, pola contra, afírmase que Rato Chus permaneceu no pazo coa que foi a súa única nai.