Comeza a novela presentando a Pedro Teixo, director da celulosa Papelgalsa, co seu can Ton, ollando cara a Insua con nostalxia: vai marchar para os EE.UU. Cóntanse logo os acontecementos que provocaron esta decisión do protagonista.
A poderosa familia dos Figueroa comezara a perder a súa decadencia cando o avó don Francisco tivera fillos bastardos e perdera gran parte do seu capital no xogo. Pedro Teixo era entón o fillo dun confeiteiro preso durante anos polas súas ideas, que cando volveu libre á casa pouco tardou en morrer reconfortado cunha sorprendente fe. Coa axuda do párroco, Pedro ingresa no Seminario de Santiago, que logo deixa para estudiar Química. Prosegue os seus estudios en Madrid e marcha para EE:UU., onde se converte nun brillante profesor universitario, que contrata como executivo unha multinacional. Pasa a ser "Míster Teijo".
Cando a multinacional se propón construír unha papeleira na ría da súa vila natal, acepta ser o director. Ten que enfrontarse ás mobilizacións dunha forte oposición ecoloxista liderada polo xove coadxuctor Daniel Pita, con quen tamén está a progre Paloma, filla de Alberto Figueroa, anticuario estafador que vende en Madrid as supostas antigüidades que expolia na vila. Pedro Teixo quere comprar a ponta da Insua, un pequeno terreo da familia dos Figueroa que se nega a vender o vello don Francisco. A cambio dun posto de traballo na papeleira, o vello mariñeiro Evaristo, bébedo, ofrécella por poucos cartos, pois segundo uns papeis gañáralla ás cartas un seu avó ao avó de don Francisco. É un terreo cobizado tamén por unha inmobiliaria.
O vello dos Figueroa morre intentando recuperar a propiedade do terreo enfrontándose cunha pistola a Pedro Teixo. Aínda que este non é culpable da morte do ancián, o duro custe nas súas relacións persoais e a realidade que, unha vez inaugurada a celulosa, non parece que se vaia instalar a anunciada papeleira, desencadean a marcha definitiva de Pedro, canso e desencantado de tantas batallas.