Neste libro de pequeno formato en edición rústica, o autor rememora en primeira persoa unha infancia transcorrida na Galicia rural dos anos seguintes ó remate da Guerra Civil. O relato abrangue un período da vida do autor que vai desde os cinco ós doce anos, aproximadamente. A través das súas lembranzas obtemos un fiel reflexo da vida da época. Os xogos, a escola, os traballos do campo, a matanza do porco, a cocida do pan, as mallas, as romarías, a emigración, as viaxes á cidade, etc. son a temática que ocupa as 161 páxinas de que consta o volume, que remata coa marcha do autor-protagonista a Ourense, para estudia-lo bacharelato.
En conxunto, esta obra ofrécenos un cadro da vida na natureza, na comunidade rural, en contraste coa vida urbana en Ourense.