Volume no que se recollen o relato premiado no XV Concurso de Contos para a Mocidade 1998 e os catro accésits. O libro vai precedido dun breve limiar asinado polas dúas entidades editoras, no que se resume a temática dos relatos premiados.
En "Currículum vitae", de Xonxa Fernández, ofrécese, en ton irónico, a descrición dunha entrevista para conseguir o primeiro emprego.
"Rúa Miuño", de Jorge Gende, describe a vida do protagonista e dos seus amigos durante a infancia.
Ana Cristina López, en "Intervalo", describe o que ocorre nun circo minutos antes de que comece a función diaria.
En "A moza do tren", de Irma Amado Nodar, o protagonista lembra, mentres viaxa no tren, a unha moza chamada Noa, que coñeceu cando era neno e da que se namorou.
Por último, Lois e Raúl Pérez Diéguez, en "O crime perfecto", narran as aventuras de tres detectives afeccionados que intentan solucionar o crime perfecto.