Contén esta primeira obra de Xosé Durán dez relatos de ficción ambientados no futuro. Un futuro no que o ser humano xa conquistou o espacio e pode habitar diversos planetas, pero no que, sen embargo, a vida na Terra está a punto de desaparecer polo progresivo deterioro do medio e pola terrible ameaza das intelixencias artificiais, as grandes promotoras deste desenvolvemento, convertidas agora en seres malévolos e destructores.
No mundo que pinta Durán é posible viaxar no tempo cara ao pasado e cara ao futuro, controlar, clonar e manipular xeneticamente as distintas especies, pero a sociedade volveuse insolidaria e mecánica. A ficción científica adquire certas doses de intriga nos tres últimos relatos, protagonizados todos eles polo inspector Murray.