Novela policial estruturada en 31 capítulos dunha extensión semellante, segundo as normas do concurso promovido polo diario no que o texto resultou gañador.
Relata a investigación do asasinato ritual e sádico dun profesor de instituto. Pero non será o único. Xorden outros e todos eles teñen en común a aparición dunha folla de loureiro na boca do cadáver. Sieiro, un policía solteiro e meticuloso, vai destecendo a trama que o guía por un mundo nocturno de drogas e sexo até concluír, grazas a un profesor universitario, que o deus Dionisio e as súas ménades, cos seus ritos crueis, teñen a explicación do proceder. Descobre entón, polo camiño, a outra historia agachada naqueles que, facendo unha vida aparentemente convencional, revelan a súa cara máis instintiva valéndose da complicidade da noite, dende o Lourenzo que ao caer o día se converte en Talia e asasina a propia nai impedida que non comprende a súa transformación ao executivo que vai á praia espiar as parellas, sen esquecer o propio Valentín, que finalmente sae do coma e abrázase ao seu amado Mauro, en cuxa despedida de solteiro comezara todo.
De todos modos, o inspector segue sen resolver o seu propio caso: a soidade non desexada. Porque, unha vez máis, tampouco a divorciada que respondeu á súa chamada o vai esperar.