Xurxo, mentres os seus pais van de compras, queda só na casa durante un día de treboada. Escoita remexer no seu armario, vai pescudar e atópase co anano Nip que o vén chamar para que libere á súa raza dos temibles pancos.
Para adentrarse no mundo dos pancos, Xurxo terá que pronunciar unhas palabras máxicas e dar uns saltiños adiante e atrás. Xa nel, atópase con tres portas de entrada: só unha delas o levará ó seu verdadeiro destino. ¿Cal?
Unha vez mergullado na aventura liberadora, terá que vadear ríos e lagos, sortear covas e montañas, e enfrontarse con patrullas de pancos que andan atrás súa e de Nip. Pero, pese a tódolos atrancos, logran chegar ó Castelo das Pedras Malfadadas e alí, na sala de maxia, logra salvar a Nap. Agora o exército dos chous xa non terá medo a perder a guerra fronte ós pancos, e os humanos estarán salvados.