Altérnanse neste relato dúas historias que acaban por confluíren no desenlace, unha situada nun tempo actual e outra, un relato de aventuras, ambientada no ano 1600.
Quino, o protagonista, está preocupado porque o seu avó debe vender a casa ante as ameazas dos membros do concello. Así que pasa toda a noite sen durmir porque está convencido de que a solución ao problema se atopa no manuscrito que recolle a aventura dun seu devanceiro, un mariño chamado Quinocho que, despois da morte do seu amigo Xocas, adopta o seu nome e se converte nun pirata que promete non pisar xamais terra firme. As aventuras deste pirata transcorren nunha viaxe a América a bordo do navío Furacán, gobernado polo capitán Xan Manoel de Villena e Pairo.
Cando amañece, Quino descobre que o verdadeiro Xocas, que morreu a mans do capitán do barco, casou con dona María de Velasco e agochou un tesouro que nunca se descubriu. Despois de contarlle os seus descubrimentos ao avó, os dous atopan na casa o medallón de ouro do capitán e un valioso anel. Sen embargo, o avó prefire conservar estes dous tesouros e trasladarse á cidade para vivir co seu fillo e neto.