Sandefjord é unha cidade de Noruega ó oeste da península escandinava. Nela, unha malvada troll, ameaza a Axel con non marchar do faiado da súa casa ata que este lle axude a realizar un feito máxico ou marabilloso. ¿Onde poderá Axel atopar unha fada ou un mendigo, unha madrastra mala, un príncipe valente, unha fermosa princesa ou un castelo encantado?
O avó de Axel sabe moito de trolls e dálle consellos dicindo que non se fíe da lúa chea, nin das árbores, nin das pedras. Calquera cousa pode ser unha troll que se agacha. Hai trolls bos e malos. O da familia é bo. Os trolls poden ser trasgos pequeniños ou enormes dragóns. Poden ser arrepiantes xigantes ou noxentos ananos. Viven en covas, bosques e fondas lagoas e camiñan en círculo. Viven milleiros de anos. Adoptan formas de fermosas doncelas para enganar ós homes. Témenlle á luz do día e á cruz dos cristiáns.