A "tribo" do autor, Outeiro de Rei, ten catro ríos, como seica o Paraíso Terreal, gracias aos versos de Manuel de Paderna, que fixeron nacer o Regato do Cepelo. Paderna, alguacil e barbeiro con cátedra de poesía, que non repara en homenaxear coa súa arte a futbolistas, enténdese coa fonte e consegue que lle axude a namorar a sobriña do alcalde. É unha das razóns polas que o alcalde don Capitón teima contra el prohibíndolle mesmo dar o pregón das festas, ademais de mandar derrear o quiosco da música e deixar esborrallar a Ermida de Santa Isabel, xurdida na lagoa gracias a que Paderna fixo que as augas seguisen a súa frauta.
A Paderna tamén lle fixo caso o pobre Vagancias: cando lle falou da xustiza, botouse un día ao monte coa espingarda. Pero no seu cano levaba unha camelia.