Nova entrega desta colección editada pola Xunta de Galicia en conmemoración do Día Internacional do Libro Infantil, coa colaboración da Asociación Galega do Libro Infantil e Xuvenil (Gálix). Recolle catro relatos:
DJ Machuquito, de Xerardo Quintiá, presenta a un rapaz de dezaseis anos ao que lle gusta o rap e facer reviravoltas co monopatín, que ás veces lle deixa feridas físicas, pero, en todo caso, son menos fondas e máis levadeiras que as que lle provoca o seu estado de namoramento. Porque dende que se namorou dunha nova compañeira volveuse tímido e non se atreve a declarárselle. Até que no festival do instituto canta un rap a capela. Ao ver que ela aplaude con entusiasmo, séntese emocionado como se entrase nun soño.
Lourdes Maceiras conta A viaxe en avión dun acomodador de cine no paro e con dificultades económicas que vai á voda dun neto e mais dun camareiro que sobrevive como pode logo de perder o traballo, que busca conseguir cartos presentándose a un concurso de televisión. Os dous coinciden de compañeiros de asento e preséntanse como triunfadores. Ao baixar, collen as bolsas confundidas, circunstancia que lles soluciona os problemas: de roupa ao primeiro, que asiste á voda co uniforme do camareiro, e da pregunta máis valiosa ao segundo, que responde con acerto grazas a un vello folleto que o acomodador levaba na bolsa.
Marcos S. Calveiro dálle a voz en Se un home perde algo a un vello cazador de recompensas reconvertido en labrego, nun intento de redimirse e devolverlle á terra as vidas que lle roubou, que reaparecen na súa conciencia como pantasmas. Eran os tempos do salvaxe oeste americano nos que a vida pouco valor tiña. Até que o cruel ataque a un poboado apache en compañía do exército ianqui, que non reparou en arrasalo levando por diante a vida de mulleres e nenos, e ante a visión dun vello menciñeiro a quen intenta salvar, provoca unha insólita reacción: comeza a disparar contra os soldados. Foxe logo e vaga solitario, até que compra unhas terras cos cartos da última recompensa e convértese en labrego co duro traballo de sementar na terra.
Finalmente, María Canosa presenta no Café do Ramón unha historia que o narrador escoitou sendo neno un día de tormenta da boca dun vello mariñeiro, que contou cando no bar se foi a luz como a tripulación do seu barco conseguira evitar un naufraxio. Mais caera un home á auga. Fora el mesmo. Que desapareceu misteriosamente e oito días despois apareceu morto.