¿Hai algo máis interesante que facer unha viaxe do cole en tren na compaña dun escritor que vos sirva de guía? Eis unha boa idea: cada ano Caixa Galicia e RENFE organizan unha viaxe desde Santiago ata Padrón chamada "Ruta Rosalía", e con este motivo publican un libro onde aprenderedes moitas cousas sobre Rosalía, unha das autoras máis universais da nosa lingua.
No libro do ano 1993 colaboran: Suso de Toro, co relato Caramelo de limón, e María Victoria Moreno con outro relato, O libro das saudades e os degoiros. Tamén tedes os textos gañadores do concurso de narracións 1992, xa que cada ano as entidades patrocinadoras convocan un concurso para os rapaces que realizan esta viaxe.