Branca é unha rapaza chea de ilusións. Unha hepatite obrígaa a gardar cama durante uns meses, tempo que aproveita para facer un repaso das súas experiencias infantís. Un álbum cheo de fotografías evocará esas sensacións xa vividas. Ó mesmo tempo, Branca decátase de que deixa atrás unha parte importante da súa vida para dar paso á adolescencia.
Os vellos e novos medos, as angurias que comezan a despuntar, as certezas que antes se atopaban vestidas de incerteza e a descuberta de sentimentos tan cruciais coma o amor contribúen a ese proceso de maduración persoal apreciado pola protagonista.