Rematou o curso escolar e son as vacacións do verán. Coa profesora de Naturais os nenos e as nenas fixeron varias saídas ó campo e, entre outras cousas, recolleron pegadas de animais, moldeándoas, para levalas á escola. A Olalla entusiasmoulle tanto que, na mañanciña, sae da casa decidida a encontrar pegadas frescas, e diríxese ó Monte do Castro. Encóntrase alí cun trasno chamado Xiao que di andar en busca dun torques máxico de ouro que pertencía a un dos máis grandes druídas celtas de tódolos tempos.
Olalla vai axudar a Xiao a buscar o torques. Emprenden unha longa viaxe a través dos catro elementos da natureza, terra, auga, aire e lume. A viaxe vai sendo marcada por unha serie de pistas que van atopando e que lles indican o camiño a seguir. Despois de moitas dificultades, logran atopar o torques máxico co que se poden preparar menciñas que curan graves enfermidades.
Cunha linguaxe en ton de desenfado e con toques de humor, introdúcenos a autora no mundo das lendas a través dos personaxes de Olalla e Xiao e de elementos característicos: trasnos, fenómenos estraños provocados por estes, animais que falan, invocacións ós ventos, covas de dragóns e de serpes....