Como vén sendo habitual todos os anos, Galaxia edita un volume nesta colección infantil centrado nas figuras homenaxeadas no Día das Letras Galegas, neste ano os tres trobadores Martín Códax, Mendiño e Xoán de Cangas.
Segundo expón Henrique Monteagudo no limiar a súa intención é ofrecer, dende un nivel inicial, "uns elementos mínimos de abordaxe do complexo fenómeno cultural que supuxo a lírica galego-portuguesa". Para abordar o estudio repasa ao longo de sete capítulos os conceptos clave que axudan a entender esta producción, fundamentalmente, límites cronolóxicos, xéneros, técnicas de construcción, distincións entre trobadores, segreis e xograres, etc. Ofrece ademais un estudio da denominada cantiga de romería, achegando as súas características temáticas e formais e os autores que as cultivaron, e unha lectura individualizada de cada un dos trobadores homenaxeados. Pecha o volume un "Apéndice para ler o galego medieval".