Resalgario, fillo do Demo Maior, cóase no carro do pai o día que este adoita dar un paseo polo mundo e recibe como castigo botar un ano de peregrino a Compostela.
Comeza deste xeito a súa accidentada viaxe en Traslicia. Un dos problemas é a comida: unhas mazás verdes roubadas fan que teña que espantarlle a morte ao dono e concederlle un tesouro; na seguinte ocasión, gaña a comida gadañando na herba; na praia dos golpes, un raposo ensínalle a coller cangrexos co rabo e intenta enganalo para comelos el só pero o demo foi máis listo. A súa presencia física tamén lle ocasiona disturbios: a garda civil deteno pois vai indocumentado e pode ser un inmigrante ilegal, pero a cambio de comida axófralles a finca dominando os escaravellos; a xente asústase ao velo e ata un amante foxe espavorido, aínda que el non pode facer o "como queiras" coa moza por non lle dar endereitado un pelo do pube. En calquera caso, os que intentan aproveitarse del reciben despois unha boa mostra da súa ruindade e astucia.
Non todas as experiencias son negativas. Libra por non o recoñeceren na feira das palabras, onde a xente compra palabras, pois ao dicilas saen da boca, liscan, e a cantidade delas que un ten é limitada; ou por non desenganar a Marcos, o evanxelista, que leva séculos nunha ermida pois o pai de Resalgario enganárao gastándolle a broma de que aínda lle faltaban outros tantos miles de quilómetros como os que andara para chegar a Compostela.
Cando falta pouco para chegar ao Obradoiro, recibe por medio dun morto que el sacara da praza pública na que estaba por non pagar as débedas e que agora traballa de correo entre a parroquia dos mortos e a dos vivos, unha carta en clave da súa mai, onde lle expón a fórmula para endereitarlle o pelo á moza. Eis a súa perdición: logo de conseguila e despois de darlle os croques correspondentes a San Croques (que transixiu a cambio de sacarlle a mai do inferno, da que vendera a alma para poder acabar a súa magna obra), decidiu non marchar co seu pai, que o veu buscar ao Obradoiro: os bicos da moza puideron con el.