A raíña Eufemia, muller do rei Artús, xefe dos nove clans celtas afincados nas terras do Limia, morre ao pouco de nacerlle a filla Lúa. Dama Rovena a Triste é a elixida para encargarse da súa crianza.
A tristeza de Rovena -viúva de Ferreol, xefe do clan dos Baluros, quen preferiu matarse antes que caer prisioneiro- débese a que lle levaron as fadas da Lagoa de Antela o seu fillo Brandón cando tiña só dous anos. O bardo Kián díxolle en forma de enigma como podería rescatar o seu fillo.
Enteirada Lúa, descobre gracias a tres soños que é a destinada a salvar a Brandón desentrañando o enigma. Pídelle a Dama Rovena unha descrición de Brandón con quince anos e entón séntese namorada del. Aínda que só ten doce anos, xa pode emprender a aventura de ilo liberar.
Sorteando perigos e desvelando enigmas, e gracias á axuda de novos amigos -lobos, osos e un trasno verde ou xas- que consegue no camiño, chega á Lagoa de Antela. Alí, na vella Antioquía, o derradeiro día da primavera, cando co solsticio a Lúa e o Sol se fan iguais, os osos fan que suba a auga e apareza o pazo de ouro e cristal. E con el Brandón, a quen deste xeito libera das fadas e converte no seu home.