Á pirata Noa Penamoura, terror dos sete mares, entroulle un día a morriña e antoullóuselle unha cunca de caldo. Ningún dos seis cociñeiros que o intentaron foi quen de a facer, polo que só cabe unha solución: volver á aldea natal e que llo faga a nai.
Pero o malvado don Carlos, o gobernador, sospeita que a viaxe obedece a outras razóns. Ten que haber un tesouro que explique a volta da capitana. Encárgalle entón ao capitán Manteigas a difícil misión de facerse con el.
Comeza así na aldea natal de Penamoura unha carreira frenética por atopalo, con secuestro incluído e algún que outro namoramento. Ata que os piratas marchan de novo pero xa sen a capitana, que queda na súa terra ¿tranquila?
Cunha prosa excepcional en clave de parodia, esta novela de piratas achega aos lectores mozos e adultos o pracer da boa literatura.