O libro está estructurado en vinte capítulos que son narrados alternativamente por Sheila e Said.
Estes dous irmáns viven no ano 2075, teñen dez e doce anos e, desde que morreron os seus pais nunha guerra no Oriente Medio, residen en Galicia co seu avó Xan. Traballan como deseñadores de tecidos, e envían as súas creacións a través da rede informática. Gracias á avanzada tecnoloxía destas redes, conseguen tamén enviar información escrita ao pasado e contarnos a súa aventura.
Esta aventura comezou o día que descubriron na pantalla do ordenador unha noticia relacionada cunha nova planta que ía substituír outros cereais e solucionar os problemas alimentarios da humanidade. Os rapaces procuran máis datos e descobren que unha planta monstruosa está a arrasar a pampa arxentina e outros lugares da Terra.
Deciden viaxar a Arxentina e alí coñecen por si mesmos o que ocorre coa planta.
Chegan á conclusión de que están ante un grave perigo para a humanidade ao que hai que facer fronte. Na súa aventura van contar coa axuda doutros amigos e, entre todos, atoparán un remedio para acabar coa praga vexetal.