Trátase dunha obra reeditada no 1996 nunha colección infantil, como homenaxe a Ánxel Fole, a quen se lle dedicou no ano 1997 o Día das Letras Galegas.
"Pauto do demo", editada por primeira vez en 1958, constitúe o único achegamento do autor lucense ao mundo do teatro. Esta peza presenta un episodio situado no marco dos costumes da aldea galega e a incursión en temas tan tradicionais coma os espíritos, a maxia, o demo, as bruxas ou as populares conversas de taberna nas que tódolos personaxes comentan os feitos máis importantes dos seus veciños. A artificiosidade da linguaxe empregada por Don Pancho contrasta coa mentalidade e a expresión dos paisanos, dando paso a unha serie de escenas nas que predomina o elemento humorístico.