Lena Castelo empata coa curmá Raquel na disputa familiar polo devecido posto de asistenta no verán do tío Malaquías e da tía África no laboratorio da Punta das Furnas. A ela tócalle o mes de xullo. O tío é un sabio experto en Criptozooloxía, especializado en estudiar os Pés Grandes.
Ela está pendente das mensaxes que chegan polo correo electrónico. Un día reciben por fin a convocatoria de Meuric para se xuntaren en Gales e planificar a expedición para estudiar os Almas de Mongolia. Alá vai o tío. Mentres, ela e a tía viaxan aos Ancares, atendendo o chamado dun mozo descoñecido en demanda de axuda para salvar o tangaleirón, o ser mítico daquelas montañas, que quere capturar un traficante internacional.
A viaxe tórnase unha perigosa aventura cando descobren que o mafioso é un asasino, co que a tía ten unha vella e dolorosa conta pendente, que agora poderá saldar. E o coñecemento de Abel, coa maxia do espacio natural, cambia decisivamente a vida de Lena.