 |
Miscelánea de
textos co obxectivo declarado de que "os rapaces queiran a Lingua Galega".
Reúne textos diversos de diferentes xéneros literarios, seguindo
unha estrutura común: un relato ao que segue unha proposta de
actividades sobre as súas características e mensaxe; un poema de
carácter costumista, lírico-intimista ou de proclama social;
outro texto narrativo moi breve que relata unha anécdota
humorística ou chiste popular. Finalmente, péchase o libro cun
pequeno texto dramático sobre un mozo que bebe os ventos por unha amiga,
coa que baila na festa, e ten as típicas diferenzas cos seus
maiores.
Nos relatos alternan as técnicas realista e
fantástica, as voces narrativas e o protagonismo. Así,
céntranse en: un borracho e a súa amiga, a botella; a nena pobre
que non tiña xoguetes o Día de Reyes; un debuxo que cobra vida e
fai trasnadas na aula; unha muller gorda e lambona; unha moza aparecida nun
barco que esperou no seu castelo a que alguén desencantara ao seu amado,
convertido en vagalume; un ril, que é tan beneficioso para o
funcionamento do corpo; un gran de trigo, do que se obtén o
imprescindible pan; a folla dun carballo namorada dun xílgaro, a quen
xunta unha nube boa e útil; a cabra do planeta Ceboleiro, o máis
avanzado de todos os da Galaxia; un escaravello, tan necesario nas hortas; o
avó, que lles conta aos netos vidas de santos...
En todos eles
incorpórase, ademais do xogo narrativo, unha intención
didáctica e exemplarizante. |
