Por medio desta narración, coa que Antonio Reigosa foi o gañador do Premio Merlín, pódese coñecer máis polo miúdo o mundo aventureiro e sagaz dos animais. Afonso Alfonso, un raposo nado no Morollo da Golpilleira, que non estaba nada convencido coa vida que estaban levando os animais da súa mesma especie, decide dirixirse a eles para contarlles quén foran, quén eran e en qué parte do mundo estaban. Logo de aclararlles todas estas cuestións, relatarlles moitas das aventuras protagonizadas por outros raposos e por el mesmo, gracias ás cales, ademais de explica-la orixe dalgunha das súas tradicións, como o "Día de Non comer Nada" ou o das "Palabras Recrebadas", tamén deixa ve-la súa grande intelixencia e inimizade con outros seres, entre eles os lobos ou os cans.
Como xa é habitual nesta colección, péchase o volume co apartado "Cando o autor fala de si", no que Antonio Reigosa nos narra parte da súa vida e a relación que mantén co raposo protagonista desta historia.