O cego de Baladouro, Cidre Oután, regaloulle a Estevo un libro vermello, que tiña soamente letras visibles para el. Deberíao ler ata sabelo todo de memoria; unha vez aprendido sería quen de arranxar grandes desfeitas e vivir marabillosas aventuras. A vila de Baladouro padecía estes días un forte temporal de auga, tan grande que parecía alagarse. Estevo recordou de memoria o que dicía O Libro Vermello sobre treboadas e dioivos. Tivo Estevo que saír da vila para procurar o remedio para tamaña maldición, semellante á das cidades de Antioquía de Ornia e de Ys. De a cabalo da egua Pindusa, vai onda don Darío Barreiro, bibliotecario de Preguín; visita á meiga Munia quen lle revela a aparición do mapa secreto de Illó Escuro; busca na selva de Ibia a Sombra da Muiñeira; coñece ao escritor popular e naturalista García Buño de Listera; encara sen medo os misterios de Fonte Loureira; e atopa, por fin, a cova do nubeiro, sita no lugar de Antigo, ao pé da lagoa Azoreira, desde onde se poden ver as igrexas de San Tirso de Oseiro, Santa María de Lañas e Santa Eufemia de Arteixo.
Estevo engaiola ao nubeiro coas aventuras que lle foran acontecendo mentres o procuraba, e ademais regálalle uns zapatos negros. Agora xa non chove máis sobre Baladouro, e Estevo, nos momentos que lle deixa libre o seu novo oficio de Bibliotecario Maior da Biblioteca de Preguín, vaille contar novas historias ao nubeiro.