Na fosa atlántica, onde ata 1982 os países europeos botaron vertidos radiactivos, dous pesqueiros descobren un resplandor misterioso procedente dunha gran mancha brillante. A OTAN envía uns barcos a inspeccionar a zona e resultan ser unhas flores brancas de intenso recendo que provocan en quen as cheira a súa conversión ao pacifismo. Os propios soldados que foran alá desertan do exército. Ao tempo, Alba, en Pontebranca, axúdalle a seu irmán, membro da organización ecoloxista ADEGA a recabar información sobre elas e mesmo se mete de polizona no Firrete, barco no que un grupo de ecoloxistas e periodistas van visitar a fosa. Gracias á rapaza, conseguen facerse cunha mostra das flores, protexidas por un barco militar cunha enorme rede pola que ela se coa. Analizadas, informan á opinión pública mundial do efecto nada radiactivo das flores mutantes, como pretendía facer crer a organización militar, que mesmo as bombardeara. Espállanas por todo o mundo, producíndose entón desercións masivas nos exércitos e parándose todas as guerras.
Como anexo informativo, incorpóranse ao final do libro documentación sobre os vertidos na fosa atlántica e unha entrevista imaxinaria co autor.