No primeiro relato deste libro, titulado precisamente A cor do elefante, Marga, unha rapaza moi inqueda, ten a oportunidade de atopa-lo protagonista dun conto: un elefante de cor morada, que ademais de falar viaxará de Madrid a Vigo para coñecela.
No segundo relato, Conto do neno despistado, coñecemos ata onde pode chega-la desorientación dun rapaz que todo o confunde e mestura, tanto as cousas físicas coma os sentimentos e as emocións.
En Xanciño Botello, matador de marcianos, sabemos do efecto que os xogos electrónicos exercen sobre un rapaz, que chega a confundi-la fantasía coa realidade.
Finalmente, en A máquina que non quería traballar tres personaxes (unha máquina, unha formiga e un gato) van de troula para fuxir das tarefas cotiás, sufrindo despois as consecuencias disto.