En Confesión de parte, Alfredo Conde recorda a súa infancia tan unida ao paso do tren, en Pontevedra. Lembra que entón súa mai lles contaba películas cando ía ao cine pola noite e seu pai falaba da súa nenez en Allariz, que chegaron a identificar como propia. Escoitaban así as historias que os pais sabían, aínda que non os contos clásicos, verdadeiramente infantís.
Ana Expósito Valle narra en A guerra de Huso a vida dun rapaz musulmán de Bosnia, que vivía coa súa nai e o seu irmán maior no vagón dun tren, dentro dun campo de refuxiados, e soña cada noite con ir rescatar uns poucos libros da ardida e importantísima biblioteca de Saraxevo.
X. A. Neira Cruz en Rosalía tralas máscaras do tempo (publicado como volume independente co título de Rosalía) viaxa ata a época do nacemento de Rosalía de Castro por medio do enxeñeiro Amaro Mendiño. Asiste logo ao bautizo, a súa mocidade teatral en Compostela ou ao día do seu pasamento. Entre os elementos narrativos intercala cartas, textos e datos sobre a vida e época da escritora que lle fornece o ordenador Chiño.