Ana Mª Fernández / Xoán Babarro: Contos do reino de Mamoranguá
Ilustracións de Xulia Barros
Col. Elefante Contacontos, 10. Ed. Ir Indo. Vigo, 1999

Nunha nota inicial, os autores explícanlle ao seu lectorado que, trala repentina desaparición do Tío Sebastián, un aventureiro e intrépido periodista, que perdera a súa vida en Afganistán, atoparon unha serie de cadernos que ata daquela descoñecían e que tiñan por título "Contos do reino de Mamoranguá". Neles recollía as súas aventuras nas exóticas terras do Novo Mundo, a través das cales daba a coñecer os seus habitantes, os seus costumes, as súas tradicións e crenzas ou a súa tan exuberante e rica vexetación e fauna. Así que, interesados en dalos a coñecer, decidiron publicalos engadíndolle algunhas notas aclaratorias a pé de páxina para explicar moitos dos elementos que conforman aquelas afastadas terras e que resultan descoñecidos para as persoas alleas a aquela área xeográfica e cultural.
Trátase, en fin, dunha serie de historias, protagonizadas polos indíxenas americanos e a través das cales se achegan as súas máis ancestrais tradicións e se mostran parte dos elementos integrantes do seu mundo.