Nesta edición institucional con motivo da VII Campaña de Fomento da Lectura recóllense catro contos orixinais de tres recoñecidos autores galegos:
Xosé Manuel Martínez Oca abre o libro con "Patxi e Fuco". Patxi é un rapaz que vén pasar un mes de vacacións á aldea dos avós galegos. Séntese tan a gusto en plena natureza que logo non lle apetece volver para Bilbao cos pais. Para convencelo, vai con el para a cidade o curmán Fuco, que se marabilla de todo o que ve. Cando se teñen que separar, Patxi arela medrar e vivir no paraíso da aldea e o curmán soña con poder ir vivir á cidade.
Salvador García Bodaño conta en "A pedra" como un rapaz e unha rapaza da Illa do Home Santo oíron un día o son dunhas campás no mar. Foron onda o ancián Home Santo da Torre, condenado a vivir recluído na torre facendo penitencia un tempo igual a multiplicar por dous os anos que ía vivir, desde que quedou asolagada a cidade de Compostela. Cóntalles a historia. Todo empezou cando levantou unha pedriña redonda das que chaman "dente de cabalo" na casa e comezou a saír auga, que pouco a pouco cubriu toda a cidade ata asolagala totalmente, cando deixaron de ser visibles as torres do Obradoiro e a Berenguela. Entón saíron da auga sete bólas ígneas ou estrelas, que logo desapareceron. Por iso aínda hai ribeiráns que din sentir o son xordo dunha campá que vén do mar.
Agustín Fernández Paz colabora con dous "contos por palabras". En "Unha pantasma en apuros" conta a historia dun fantasma que, seguindo a maldición familiar, aínda que morreu no XVII e estamos en 1990, está condenado a vir vivir ao pazo familiar un ano enteiro cada vintecinco. Só se liberará da maldición cando unha moza se namore del. Co pazo familiar ruinoso e sen as xoias da familia que debeu usurpar un descendente, e ante as novas posibilidades que lle ofrece a sociedade de consumo, pon no xornal un anuncio de venda do dormitorio antigo para obter cartos, pois ademais hai unha moza que parece facerlle as beiras. "Un máxico negocio" figura con mínimos cambios estilísticos recollido nunha reedición do libro Contos por palabras.