Reúne os relatos premiados no cuarto Premio Literario O Grelo-Amigos de Galicia, que nesta edición estivo dedicado á memoria da mestra falecida Mª Rexina Míguez Noval. Vai introducido por dúas presentacións: unha de Xesús Busto Peteiro, presidente da Fundación O Grelo, e outra de Xavier Rodríguez Barrio.
A seguir preséntanse os catro relatos premiados: "Demo", de Paulo Martínez Lema, no que o protagonista vive unha experiencia aterradora cun can posuído polo demo; "Lembranzas", de Susana Villaverde Otero, no que a protagonista recupera as lembranzas da súa avoa, as conversas e contos ao redor da lareira, as sensacións nun día de sol no verán, o traslado ao piso da cidade, etc.; "O pozo do tempo", de Aida Noceda Abeijón, onde se narra a aventura dunha cuadrilla de rapaces o día de San Xoán, ao atoparen unha botella no mar cunha suxestiva mensaxe; "Bambú", de Bibiana Amoedo, que conta a historia dun oso panda chamado Bambú perseguido por uns cazadores que o separan da súa familia.

A nosa literatura infantil e xuvenil 1997
Gálix (Asociación Galega do Libro Infantil e Xuvenil).
Coordinación: Mª Isabel Soto López.
Xunta de Galicia - Consellería de Cultura - Dirección Xeral de Cultura. Guías culturais, 17. 1998