Conta Olalla da Ponte, estudiante de quinto de E.X.B, que un día foi coa irmá, Minia, ata "a casa abandonada", á que ninguén se achega pois seica pesa sobre ela unha maldición que acabou cos membros da familia que a habitaba. No soto máncase nun pé e desmáiase, polo que teñen que rescatala os pais e bota varios días sen poder saír á rúa. Na escuridade, gardara un obxecto frío, que resulta ser un óso. Cando llo ensina ao irmán, Ramón, de quince anos, este vai explorar a casa, pero como o soto segue asolagado, cae e perde o óso. Desde entón, Olalla búscao de noite, somnámbula.
Nas vacacións de Nadal, van os irmáns pasar uns días onda a tía á aldea, pero teñen que volver antes de tempo pois resultan accidentadas: fan unha incursión nocturna no faiado, onde cren oír ruídos estraños, rompen os pantalóns botándose por penedo como se fose un tobogán e provocan que o can Xil monte un rebumbio tirando coa tía, cando recibe a vistia dunhas amigas. E, para colmo, unha noite Olalla queda pechada, somnámbula, no cuarto de baño.
Por Reis, estrea unha bici, con tan mala sorte que cae dela e ten que gardar cama tres semanas. Mentres, os irmáns van á casa misteriosa. Coa axuda dun policía amigo, achican a auga do soto e descobren a tumba dun cadáver e mais unha bolsa con sete aneis de ouro: morreran oito familiares na casa e o último gardara as alianzas. Xa non teñen dono, pois os descendentes, emigrantes en Cuba, están ilocalizables. Agora son de Ramón. Unha vez curada Olalla, atopan na casa unha araña curiosa, cunha cruz branca no lombo: a "araña da cruz", con veleno mortal.
Acabada a aventura, o pai consegue un ascenso na empresa de coches: noméano encargado da filial en Seattle, nos Estados Unidos. Toda a familia está contenta co traslado, que será en abril, polo que se poñen a aprender inglés rapidamente.