Recorda Roi que sendo un cativo entrou a traballar na fonda do fidalgo, a Pousada do Corvo. Nacera no portocelo de Sabadelle, preto do cabo Vilán. Seu pai andaba embarcado por América ao servicio da Coroa. Á volta, no pouco tempo que lle quedaba de vida, contoulle fermosas historias do mar e meteulle a febre da navegación.
Con quince anos, coñeceu a ferocidade do terrible e sanguinario pirata Arripai, coñecido tamén como o Demo Negro, o derradeiro dos grandes bucaneiros do Caribe, que arrasou os portos da Costa da Morte, violou as mulleres e raptou a Mariña, a inseparable amiga de Roi. Traballando logo nun almacén para barcos, escoitou tantas historias sobre o poder do pirata que soñaba con embarcar e enfrontarse a el. Tres anos despois, coa arribada á vila do capitán Araña, que lle tiña a morte xurada a Arripai, realizouse o seu soño. Enrolado na goleta Aurora, foi un membro máis da tripulación do mítico capitán con patente de corso por licencia real. Era o tempo do próspero comercio coas Indias, traendo froitos das colonias do Imperio do soberano Carlos, tan apreciados en Europa.
Cando chegaron a Veracruz, onde tiña a base o capitán, saíron na demanda de Arripai. Localizárono e perseguiron o seu barco Intrépido, que encallou nuns cons e, atrapado nas rochas a mercé dos canóns do Aurora, partiu en dous. Pero un terrible vento e montañas de ondas provocaron tamén o naufraxio da goleta do capitán Araña. Só se salvaron Uktena -indio, un dos últimos membros dunha tribo perdida-, Pinto -o can do capitán Araña- e mais el, gracias a unha táboa e á experiencia daquel. Entón puideron pasar a Tampa, na Florida, terra católica e española.
Segundo informa o autor ao final do libro, o barco, a tripulación e mailo capitán Araña existiron realmente, aínda que a historia é ficción.