Novela na que un mozo relata o que lle aconteceu tras contraer unha débeda relacionada coa droga. Así, foxe co seu avó que, tras rifar coa súa filla, tamén se decide a marchar da casa.
A obra divídese en tres partes. Na primeira, titulada "A fuxida", o avó e o neto emprenden a fuga procurando non deixar pegada, e diríxense á aldea natal do primeiro, un lugar coñecido co nome de Brumoso e que lle dá título á segunda parte, na que atopan pousada na casa dunha veciña vella. Mentres están na aldea o mozo descobre un mundo totalmente descoñecido e moi diferente ao seu mundo urbano.
A segunda parte está tamén marcada polo misterio, posto que a hospitalaria vella vaise volvendo malencarada e semella que garda algún segredo nun pozo atoado con cascallos. O mozo e o vello sospeitan que a muller ten enterrado alí ao seu marido, do que ela di que marchou un bo día e nunca máis volveu.
Na terceira parte titulada "Volta" emprenden o regreso á casa logo da intervención da Garda Civil, que xa os tiña controlados dende o primeiro momento da fuga. Cando chegan á casa son acollidos con pouco entusiasmo e o problema coa débeda que provocara a fuxida xa estará solucionado.
O libro inclúe ao final a habitual sección da colección Merlín "Cando o autor fala de si".