Conta Chrétien de Troyes no outono da súa vida que Breogán de Guisamonde chegou, desde a Gallaecia, a Camelot e logo de demostrar o seu valor durante meses de aventuras con Galván, a quen mesmo lle salvou a vida, foi armado cabaleiro da Mesa Redonda polo rei Artur. Unha gaivota pousada entón no seu ombreiro será a súa eterna compañeira.
Coñecedor tamén dalgúns feitizos, convértese nun heroe na corte como profetizara o propio Merlín, o que provoca que Xenevra se namore del. Rexéitaa, pois agárdao no seu país Exeria de Brigantium. Entón a raíña infiel pide axuda a Morgana, que intenta enfeitizalo, sen o conseguir. Pero xa corre demasiado perigo alí, polo que decide voltar á terra. Aínda que o vello Chrétien non nos pode contar dos seus pasos posteriores.