Conxunto de vinte e cinco poemas en verso libre titulados con cadanseu verbo, segundo a orde alfabética, que constitúe o punto de partida para o motivo lírico.
En clave coloquialmente metafórica (a chuvia é unha "manda de nubes elefantes / que buscan ríos nas rúas") os temas buscan a comunicación desde a proximidade das situacións cotiás: bailar ("debería estar permitido / bailar a todas horas"), comer, enfadarse, envellecer, estrear, medrar, rir ou chorar (as bágoas son "un río sen encoros" á procura do mar do noso peito "polo que somos quen / de nadar como sereas")...
En realidade, están os grandes temas da poesía: se vivir (amando) é descubrir o "puzzle da existencia", morrer é coñecer "o misterio da outra banda", navegar é viaxar por un mar feito de estrelas e ser é un "eusonnonsonsonsó". Ler o libro é viaxar para atoparse a un mesmo, para volver á cerna onde sempre estivemos porque "os poetas escriben / con follas de ouro branco / e ollos de maxia (...) / onde nós só vemos / campo gris e amezante". Por iso esta poesía é como unha praza "onde caben os nenos / que habitan os domingos / e comen chocolate / e rin fóra das sombras".
A edición compleméntase cun moi axeitado traballo de ilustración.